Хөвсгөл аймгийн Улсын бүртгэлийн хэлтэс нь “Монгол улсын Иргэний үнэмлэх гардуулах ёслол”-ыг 2022 оны 04 дүгээр сарын 24-ний өдөр амжилттай зохион байгууллаа. Хөвсгөл аймгийн Дэлгэрмөрөн цогцолбор сургуулийн сурлага хөдөлмөр, урлаг, спортоор тэргүүлсэн 30 хүүхэд иргэний үнэмлэхээ хүндэтгэлтэйгээр гардан авч, эх орон ард түмнийхээ өмнө тангараг өргөлөө. Тус арга хэмжээнд УИХ-ын гишүүн, БШУ-ны сайд Л.Энх-Амгалан, Хөвсгөл аймгийн Улсын бүртгэлийн хэлтсийн дарга Б.Мөнгөнзул, Боловсрол шинжлэх ухааны газрын дарга н.Ганзориг, Мөрөн сумын Засаг дарга Б.Батбаяр, Мөрөн сумын ИТХ-ын дарга П.Нямдаваа нар оролцож залуучуудад иргэний үнэмлэхийг гардуулсан юм.
Иргэний үнэмлэх гардуулах, андгай өргөх ёслолыг зохион байгуулах нь сурагч хүүхдүүдэд эх орноороо бахархах, хайрлах, хамгаалах, нийгэмд зөв төлөвшил бүхий иргэн болж төлөвших, эх орныхоо эзэн байх, улс орныхоо хөгжил дэвшлийг түүчээлэн манлайлах иргэн болох эхний алхмын баталгаажуулалт юм. Хөвсгөл аймгийн хэмжээнд 2022 оны 1 дүгээр улирлын байдлаар 16 нас хүрсэн 621 иргэнийг иргэний шинэчилсэн бүртгэлд хамруулж, иргэний үнэмлэхийг олгосон байна.
